Strandríkin sem eiga aðild að viðræðunum um stjórn veiða úr makrílstofninum, Ísland, ESB, Noregur og Færeyjar, komu saman á Írlandi í gær og fyrradag. Þar var ákveðið að makrílkvótinn fyrir næsta ári yrði 1.021 þúsund tonn. Þetta er 14% aukning frá kvóta yfirstandandi árs.
Að venju gerðu ESB, Færeyjar og Noregur samkomulag um skiptingu kvótans sín í milli en skyldu eftir 15,6% fyrir aðrar þjóðir, þeirra á meðal Ísland. Íslendingar hafa ekki sætt sig við þessa skömmtunarreglu og telja sig eiga rétt á 16-17% hlut í heildarveiðinni.
Það kemur í hlut sjávarútvegsráðherra að ákveða hver kvóti Íslands verður. Ef beitt verður sömu aðferð og á undanförnum árum til að halda hlut Íslands í samanburði við aðrar þjóðir myndi kvóti Íslands verða aukinn um 14% eða úr 153 þús. tonnum í ár í 174 þús. tonn á því næsta. (Í þessum tölum er ekki tekið tillilt til geymslukvóta frá fyrra ári en að honum meðtöldum var íslenski kvótinn 168 þús. tonn í ár).
Samkvæmt samkomulaginu sem hinar þjóðirnar gerðu á Írlandi í vikunni verður kvóti ESB 503 þús. tonn, kvóti Noregs 230 þús. tonn og kvóti Færeyja 129 þús. tonn.
Alþjóðahafrannsóknaráðið (ICES) áætlar að heildarveiðin í ár verði 1.070 þúsund tonn. Ef hún eykst um 14% á næsta ári verður hún 1.220 þúsund tonn. Ráðgjöf ICES fyrir næsta ár er 944 þús. tonn.